শংকৰদেৱ একাডেমীৰ তুমি নীলাঞ্জনা বৰুৱা - ১

নীলাঞ্জনা,

তোমাৰ অভিমানী চকুযুৰিৰ

তপত অশ্ৰুৱে

বহুদিন তিয়াব পৰা নাই

মোৰ বগা চোলা ।

তোমাৰ লিহিৰি আঙুলিৰ পৰশে

চেঁচা কৰিব পৰা নাই

মোৰ তপত কলিজা ।

নীলাঞ্জনা,

কিয় বাৰু তুমি মোৰ বুকুৰ জেওৰা পাৰ হৈ

মোৰ হৃদয়খন চুৰ কৰি নিলা ?

আজি মই আৱেগবিহীন,অনুভূতিবিহীন

কাৰণ আজি যে মই হৃদয়বিহীন ।

শংকৰদেৱ একাডেমীৰ নীলাঞ্জনা বৰুৱা,

মোৰ হৃদয়খন সযতনে ৰাখিবা ।

কথোপকথন - ২

মোৰ দুচকুৰ বিষণ্ণতাৰ

কজলা ডাৱৰখিনি

তুমি তোমাৰ দুচকুত বাকি ল’লা ।

তোমাৰ দুওঁঠৰ বাঁহীত
মোৰ শূণ্যতাৰ অনুৰণন ।

নৈখনে আজি আকাশ চুমাৰ কথা আছিল ।

শেলুৱৈ গঁজা শিলত এটি জীৱনে উচুপাৰ কথা আছিল 

আঙুলিৰ ফাঁকেৰে
এন্ধাৰবোৰ সৰকি যোৱাৰ কথা আছিল ।

কথা নাছিল -

প্ৰতিটো সন্ধিয়াৰ হেঙুলীয়াখিনি পি পি

মোৰ বাবে অপেক্ষা কৰাৰ কথা নাছিল ।

মৰহিব খোজা হালধীয়া সপোনবোৰক

তুলি -তালি সেউজীয়া কৰি

মোৰ বুকুত ৰোৱাৰ কথা নাছিল ।

যি বাটেৰে তুমি মোৰ বুকুৰ মৰিশালিলৈ আহি আছা

আশাকৰোঁ সেই বাট কেতিয়াও শেষ নহওঁক ।

কথোপকথন - ১

মই তোমাৰ ডায়েৰিৰ এটি পৃষ্ঠা বিচাৰিছিলো ।

তুমি তোমাৰ জীৱনৰ পৃষ্ঠা মোক দিলা ।

মই সুধিলো কিয় দিলা ?

তুমি ক’লা

তাতেই যে লুকাই আছে তুমি বিচাৰি ফুৰা

সকলো গোপন যন্ত্ৰণা ।

মই ক’লো

তোমাৰ বুকুৰ উপত্যকাত দেখা নাই মই

বিষাদৰ বান ।

তুমি ক’লা

কেনেকৈ দেখিবা ?

মোৰ বুকুত কাণ পাতি শুনা

সি যে আজি মোৰ জীৱনৰ গান ।